Plantun de Prouvènço

Pèr coumpara dos planto d'encò nostre

Salicornia procumbens & Panicum barbipulvinatum

Engano(-clino)

Salicornia procumbens

Amaranthaceae Chenopodiaceae

Àutri noum : Perso-pèiro, Salicor, Sausouiro, Sansouiro.

Nom en français : Salicorne couchée.

Descripcioun :
Es uno engano de l'an e noun renadivo au contro di gènre proche Arthrocnemum e Sarcocomia. Adounc fai pas de bouissoun e s'atrobo pulèu dins li relarg sala mai dubert. Lis estamino sorton un pau e li tres flour de cade tros soun quàsi de la meme taio, aquelo dóu mitan un pau mai grando pamens (fotò e dessin). De coumpara emé Salicornia europea.

Usanço :
Lis engano soun coumestiblo e se manjon en ensalado se soun pas trop duro, e peréu esboulentado, adoubado coume de baneto. Bèn li lava que pòu i'agué de parasite dangeirous (letouspiròsi dóu ragoundin e douvo dóu fege).

Port : Erbo
Taio : A
Fueio : ges
Tipe bioulougico : Teroufite
Cicle bioulougico : Planto de l'an

Gènre : Salicornia
Famiho : Amaranthaceae
Famiho classico : Chenopodiaceae

Coulour de la flour : Verdo
Petalo : ges
Ø (o loungour) flour : 2 à 3 mm
Flourido : Estiéu - Autouno

Sòu : NaCl
Autour basso e auto : Pancaro entresigna
Aparado : Noun

Liò : Sansouiro - Mar
Estànci : Termoumediterran à Mesoumediterran
Couroulougi : TER
Ref. sc. : Salicornia procumbens Sm., 1813

Mi(-de-ribeirés)

Panicum barbipulvinatum

Poaceae Graminaceae

Noms en français : Panic des rivages, Millet des rivages.

Descripcioun :
Aquéu mi fèr, que nous vèn d'Americo de l'uba, sèmblo proun au mi-prim, Panicum capillare, que se rescontro proun dins lis ermas e li champ à l'autouno. Se n'en destrìo emé sis espigueto de coustat que soun pourtado pèr de pecou courtet (< 3 mm) e que rèston proun proche de la ramo (< 10°). D'un biais generau lis espigueto soun mens aluenchado lis uno dis autro. Apoundèn qu'aquéstis espigueto soun mens grosso e pu fino. Pèr l'ouro es esta vist soulamen dins la valado dóu Rose, mai poudèn pensa qu'aquesto meno vai s'espandi. Coumpara emé lou mi-prim e lis àutri mi se n'avès pas l'usanço.

Usanço :
A bessai li mémis usanço que soun cousin lou mi-prim.